Policia e Kosovës ka bërë të ditur se ka hartuar dhe ka filluar zbatimin e urdhrit operativ “Zgjedhjet e parakohshme për Kuvendin e Republikës së Kosovës”, me qëllim garantimin e sigurisë gjatë procesit zgjedhor.
Sipas njoftimit zyrtar, sot në ambientet e Drejtorisë së Përgjithshme të Policisë së Kosovës janë mbajtur dy takime informuese dhe koordinuese, të cilat kishin në fokus planifikimin, zbatimin dhe koordinimin e masave policore për mbarëvajtjen e zgjedhjeve.
Takimi i parë u zhvillua me drejtorët rajonalë dhe drejtorët e departamenteve të Policisë së Kosovës, ndërsa në takimin e dytë morën pjesë edhe përfaqësues të organeve të drejtësisë, Komisionit Qendror të Zgjedhjeve si dhe institucioneve të tjera relevante vendore dhe ndërkombëtare.
Drejtori i Përgjithshëm i Policisë së Kosovës, kolonel Gazmend Hoxha, foli për përgatitjet e deritanishme dhe angazhimet policore gjatë fushatës zgjedhore, duke theksuar se deri më tani procesi ka qenë i qetë dhe pa incidente.
Ai kërkoi nga menaxherët rajonalë dhe qendrorë që angazhimi policor të zhvillohet me profesionalizëm dhe integritet të lartë.
Ndërkohë, Drejtoria për Planifikim dhe Vlerësim Operacional prezantoi urdhrin operativ, duke sqaruar detyrat, përgjegjësitë dhe koordinimin ndërinstitucional.
“Policia e Kosovës, në bashkëpunim me institucionet vendore dhe ndërkombëtare, mbetet e përkushtuar në zbatimin e detyrave dhe përgjegjësive të saj ligjore në mënyrë profesionale, transparente dhe të paanshme, me qëllim të garantimit të ushtrimit të lirë dhe demokratik të së drejtës së votës për të gjithë qytetarët. Me këtë rast, Policia e Kosovës inkurajon qytetarët që të bashkëpunojnë dhe të raportojnë çdo rast të dyshuar apo veprim të kundërligjshëm që ndërlidhet me sigurinë dhe procesin zgjedhor, përmes numrit emergjent 192, adresës elektronike [email protected] apo në stacionet policore më të afërta”, theksohet në komunikatën për media./teve1.info/
