Venezuela ka akuzuar Shtetet e Bashkuara për një “zhvatje të madhe” në një sesion emergjent në Këshillin e Sigurimit të OKB-së në Nju Jork.
Takimi emergjent i thirrur nga shteti i Venezuelës, u thirr për të diskutuar konfiskimin e anijeve që ndodhi në brigjet e vendit më herët këtë muaj.
Ambasadori i Venezuelës në OKB, Samuel Moncada e ka përshkruar konfiskimin e dy anijeve të naftës nga ana e SHBA-së si akt “më i keq se pirateria”. SHBA ka njoftuar se është duke ndjekur edhe një tanker të tretë nafte venezueliane.
Presidenti amerikan, Donald Trump e ka akuzuar Presidentin e Venezuelës, Nicolas Maduro, se drejton një kartel droge dhe tha se bandat kishin vepruar pa u ndëshkuar për një kohë shumë të gjatë.
Më 16 dhjetor, Trump urdhëroi një bllokadë detare të cisternave të naftës të sanksionuara që hynin dhe dilnin nga Venezuela, duke thënë se SHBA-të do ta mbanin ose shisnin naftën dhe anijet e sekuestruara.
SHBA-të kanë vendosur 15,000 trupa dhe anije luftarake në Paqësor dhe Karaibe, grumbullimi i tyre më i madh rajonal që nga pushtimi i Panamasë në vitin 1989, me qëllim ndalimin e trafikimit të fentanilit dhe kokainës.
SHBA-të kanë goditur gjithashtu anije venezueliane që kontrabandonin drogë, duke synuar më shumë se 20 anije dhe duke vrarë të paktën 100 persona, veprime që disa ekspertë thonë se mund të shkelin ligjet e konfliktit të armatosur.
Në Këshillin e Sigurimit të OKB-së, Moncada, tha se SHBA-të po kryenin “zhvatjen më të madhe” në historinë e Venezuelës, duke shtuar: “Ne jemi në prani të një fuqie që vepron jashtë ligjit ndërkombëtar, duke kërkuar që venezuelianët të largohen nga vendi ynë dhe ta dorëzojnë atë.”
Për konfiskimet e naftës, ai tha: “Po flasim për plaçkitje, grabitje dhe rikolonizim të Venezuelës. Qeveria e Shteteve të Bashkuara nuk ka juridiksion në Karaibe.” Ai gjithashtu pyeti: “Çfarë lidhje ka kjo me drogën?”
Ambasadori i SHBA-së, Michael Waltz, tha se Uashingtoni nuk e njeh Maduron si udhëheqësin legjitim të Venezuelës, duke argumentuar: “Aftësia e Maduros për të shitur naftën e Venezuelës i mundëson pretendimet e tij mashtruese për pushtet dhe aktivitetet e tij narko-terroriste.”
Maduro më vonë tha se “Këshilli i Sigurimit po i jep mbështetje dërrmuese Venezuelës”.
Rusia dhe Kina kritikuan SHBA-në. Ambasadori i Rusisë në OKB, Vassily Nebenzia, tha se SHBA-të po “shkatërronin në mënyrë të paligjshme” anije civile dhe paralajmëroi se veprimet e tyre ishin “një model për akte të ardhshme force kundër shteteve të Amerikës Latine”.
I dërguari i Kinës, Sun Lei, i kërkoi SHBA-së “të ndalojë menjëherë veprimet përkatëse dhe të shmangë përshkallëzimin e mëtejshëm të tensioneve”.
