Departamenti i Drejtësisë herët të martën në mëngjes publikoi mijëra dokumente të reja nga dosjet e Jeffrey Epstein , përfshirë shumë që përmendin Presidentin Trump.
Publikimi i ri përfshin më shumë se 11,000 dosje, me një total prej gati 30,000 faqesh. Dosjet përmbajnë më shumë foto, të dhëna gjyqësore, dokumente të FBI-së dhe Departamentit të Drejtësisë, email-e, prerje lajmesh dhe video.
Sipas citimeve të CBS News, njëra nga dosjet e rëndësishme përfshin një email të vitit 2020 nga një prokuror në Nju Jork, me sa duket drejtuar një kolegu, ku thuhej se regjistrat e fluturimeve zbuluan se zoti Trump fluturoi me avionin privat të Epstein “shumë më tepër herë” sesa dihej më parë.
Shumica e përmendjeve të tjera të emrit të zotit Trump në dosjet e reja duket se vijnë nga artikuj lajmesh të dërguar me email te dhe nga punonjësit e Departamentit të Drejtësisë.
Departamenti tha në një postim në X se disa nga dokumentet në publikim përmbanin “pretendime të pavërteta dhe sensacionaliste të bëra kundër Presidentit Trump që iu dorëzuan FBI-së pak para zgjedhjeve të vitit 2020”, një referencë e dukshme për informacionet e jashtme që morën hetuesit.
Pas arrestimit të Epstein në vitin 2019, prokurorët federalë zbuluan në gjykatë se autoritetet gjetën një pasaportë të skaduar me fotografinë e tij dhe një emër të rremë gjatë kontrollit të rezidencës së tij në Manhattan. Prokurorët thanë në atë kohë se pasaporta austriake, e lëshuar në vitet 1980, rendiste një rezidencë në Arabinë Saudite dhe përmbante një foto të Epstein me një emër tjetër.
Fotot e pasaportës në publikimin e së martës tregojnë pulla nga Franca, Spanja, Arabia Saudite dhe Mbretëria e Bashkuar, ndër të tjera
