Trepça ka ndalur serinë e Borës prej katër fitoreve rresht në Superligën e Kosovës në basketboll.
Të martën mbrëma, në Mitrovicë, Trepça mposhti bindshëm Borën.
Ndeshja e mbetur e xhiros së pestë, përfundoi me shifrat 90:72 për Trepçën, që me këtë fitore del e para në tabelë me 19 pikë.
Skuadra e Borës e nisi mirë ndeshjen dhe krijoi epërsi në çerekun e parë, të cilin e fitoi 21:16.
Trepça u kundërpërgjigj në çerekun e dytë që e fitoi (23:15), përpara se epërsinë ta thellojë në periudhën e tretë që e mbylli me shifrat 38:11.
Çereku i fundit, në të cilin Trepça hyri me avantazh prej 30 pikësh (77:47), ishte më shumë sa për “sy e faqe” pasi fituesi veçse ishte përcaktuar.
Këtë periudhë e fitoi Bora, por që nuk arriti ta evitojë humbjen veçse ta zbusë në 18 pikë diferencë.
Më efikasi te Trepça ishte Mikaile Tmushiq me 14 pikë, 5 kërcime e 5 asistime kurse te Bora u veçua Shaquan Jules me “double-double” prej 25 pikëve e 11 kërcimeve.
Bora mbetet e gjashta në tabelë me 16 pikë dhe tè enjten do të përballet sërish me Trepçën por këtë herë në kuadër të xhiros së 12-të.
