Juventusi nuk është në shitje! Ky ishte mesazhi i qartë që John Elkan ka dhënë sot pasi u bë publike një ofertë që kishte marrë kompania “Exor” për të shitur aksionet e klubit.
Fondi “Tether”, i cili është aksioner minorance në klub, kishte bërë një propozim për të blerë për rreth 1 miliard euro pjesën e aksioneve të “Exor”, që i përket familjes Agnelli dhe që është kuota kontrolluese e aksioneve të bardhezinjve. Por qëndrimi i familjes ka qenë i prerë dhe këtë e konfirmoi publikisht vetë John Elkan, shefi ekzekutiv i saj, i cili u shfaq në një video mesazh teksa mbante veshur një fanellë të klubit.
“Juventusi ka qenë pjesë e familjes sime për 102 vjet. Është pjesë në kuptimin më të vërtetë të fjalës, sepse gjatë një shekulli, katër breza e kanë zgjeruar atë, e kanë bërë të fortë, janë kujdesur për të në kohë të vështira, e kanë festuar në kohë të lumtura. Por jo vetëm kaq: Juve është pjesë e një familjeje shumë më të madhe, familjes bardhezi, e përbërë nga miliona tifozë që e duan Juven si të dashurit e tyre. Pikërisht për shkak të këtij pasioni, kësaj historie dashurie që na ka bashkuar për më shumë se një shekull, si familje ne vazhdojmë të mbështesim ekipin dhe të shikojmë drejt së ardhmes, për të ndërtuar një Juve fituese. Juventusi, historia jonë, vlerat tona, nuk janë në shitje”, tha ai.
Më përpara, “Exor” nëpërmjet një zëdhënësi, kishte konfirmuar se oferta e “Tether” ishte refuzuar menjëherë “unanimisht” nga bordi drejtues, teksa bëri të qartë gjithashtu se kompania “nuk ka ndërmend të shesë asnjë nga aksionet e saj të Juventusit ndaj palëve të treta, duke përfshirë, por pa u kufizuar te “Tether” me seli në El Salvador”.
