Tenisti francez Quentin Folliot, 26 vjeç, është pezulluar deri në vitin 2044 për përfshirjen e tij në një rrjet trukimesh ndeshjesh, sipas njoftimit të Agjencisë Ndërkombëtare të Integritetit të Tenisit (ITIA), duke shënuar kështu një prej dënimeve më të rënda në botën e sportit.
Pezullimi për lojtarin, i cili arriti deri në vendin e 488-të të renditjes ATP në vitin 2022, nënkupton se “i ndalohet të luajë, të stërvitet ose të marrë pjesë në çfarëdo aktiviteti tenisi të autorizuar ose të sanksionuar nga anëtarët e ITIA-s (ATP, ITF, WTA, Tenis Australia, Federata Franceze e Tenisit, Wimbledon dhe USTA), si edhe nga çdo shoqatë kombëtare”. Sanksioni prej 20 vitesh nisi më 17 maj 2024 dhe do të përfundojë në vitin 2044.
Krahas pezullimit, lojtari nga Parisi u gjobit me 70.000 dollarë dhe duhet të kthejë fitime në vlerë prej më shumë se 44.000 dollarësh, pasi rezultoi të ketë kryer 27 shkelje të Programit Kundër Korrupsionit në Tenis (TACP). Folliot u shpall fajtor si figurë qendrore e një rrjeti lojtarësh të përfshirë në trukimin e ndeshjeve dhe bëhet tenisti i gjashtë i ndëshkuar në kuadër të këtij hetimi, pas Jaimee Floyd-Angele, Paul Valsecchi, Luc Fomba, Lucas Bouquet dhe Enzo Rimoli.
Ndër akuzat ndaj tij përfshiheshin manipulimi i rezultateve të ndeshjeve, marrja e parave për të mos luajtur në nivelin maksimal, ofrimi i parave për lojtarë të tjerë për trukime, dhënia e informacioneve dhe shkatërrimi i provave. Megjithëse shumica e akuzave u tërhoqën, Folliot u konsiderua si “nyje e një rrjeti kriminal”, me rrethanë rënduese pengimin e hetimit të ITIA-s.
