Sot zhvillohen dy ndeshjet e fundit të xhiros së 10-të të elitës së basketbollit kosovar.
Takimet luhen në të njëjtin orar, nga ora 18:45, njëra në “Karagaq” dhe tjetra në Pallatin e Rinisë në kryeqytet.
Skuadra e Pejës e ka shansin e artë që, me një fitore eventuale ndaj Borës nga Prishtina, të marrë pikët që e dërgojnë në krye të tabelës, gjë të cilën ia mundësoi Bashkimi pas humbjes së djeshme nga Trepça.
Duelin e parë të zhvilluar në kryeqytet ndaj Borës, skuadra pejane e fitoi me shifrat e ngushta 96–94.
Peja vjen nga fitorja ndaj Golden Eagle Yllit, ndërsa Bora nga triumfi në derbin lokal me Sigal Prishtinën.
Për këtë takim, të dy trajnerët do t’i kenë të gjithë lojtarët në dispozicion.
Dueli tjetër i mbrëmjes zhvillohet mes Sigal Prishtinës dhe Rahovecit.
Prishtina në këtë takim vjen nga triumfi në ligën ndërkombëtare ENBL, por në Superligë pësoi humbje nga Bora.
Ndërkohë, Rahoveci i drejtuar nga Bujar Loci është shumë i motivuar pas fitores ndaj liderit Bashkimit.
Prishtina edhe në këtë takim do të paraqitet e cunguar për shkak të lëndimeve të shumta, ndërsa te Rahoveci lajmi i mirë është rikthimi i amerikanit Isiah Umipig.
Të dy këto takime mund t’i ndiqni drejtpërdrejt në platformën “Telkos”.
