Presidenti ukrainas, Volodymyr Zelensky ka përfunduar bisedimet në Londër me udhëheqësit e Mbretërisë së Bashkuar, Gjermanisë dhe Francës, ku u diskutua drafti më i fundit i planit të paqes që synon t’i japë fund luftës në Ukrainë.
Takimet e nivelit të lartë në Downing Street u zhvilluan në një moment kyç për përpjekjet diplomatike, ndërsa aleatët perëndimorë kërkojnë të harmonizojnë qëndrimet e tyre për të ardhmen e konfliktit.
Kryeministri britanik Keir Starmer priti Zelenskyn jashtë Downing Street herët pasditen e sotme, duke theksuar se çdo marrëveshje e mundshme paqeje duhet të përfshijë garanci “të ashpra” sigurie për Ukrainën.
Presidenti francez, Emmanuel Macron u shpreh se aleatët e Ukrainës kanë “shumë letra” në duart e tyre përpara bisedimeve të paqes, duke nënkuptuar se opsionet mbeten të hapura dhe presioni mbi Moskën është ende i qëndrueshëm.
Ndërkohë, kancelari gjerman Friedrich Merz shfaqi rezervat e tij, duke thënë se është skeptik në lidhje me “disa nga detajet që po shohim në dokumentet që vijnë nga pala amerikane”.
Sipas korrespondentit diplomatik James Landale, ky qëndrim përfaqëson një pjesë të një modeli tashmë të njohur në negociatat mes fuqive perëndimore për Ukrainën, shkruan BBC.
Pas përfundimit të takimit, të katër udhëheqësit u fotografuan së bashku jashtë Nr. 10, duke sinjalizuar mbylljen e diskutimeve të sotme në Londër.
Më vonë gjatë ditës, Zelensky pritet të udhëtojë drejt Brukselit, ku do të zhvillojë takime me zyrtarë të NATO-s dhe Presidenten e Komisionit Evropian, Ursula von der Leyen, për të vazhduar konsultimet mbi hapat e ardhshëm drejt paqes.
