Mbrojtësit të krahut, Arlind Veliut të skuadrës së Malishevës, i ka takuar epiteti i futbollistit më të mirë për xhiron e fundit në Superligën e Kosovës.
Federata e Futbollit të Kosovës (FFK), ka njoftuar të hënën se Veliu e ka fituar çmimin “Ylli i Javës”, i cili ndahet pas përfundimit të secilës xhiro në Superligë për futbollistin me performancën më të mirë.
Komisioni i Veteranëve të futbollit, e ka vlerësuar Veliun si lojtarin me paraqitjen më të mirë për xhiron e 15-të në Superligë.
Në fakt, Veliu ishte më i merituari për fitoren e Malishevës në shtëpi ndaj Drenicës me rezultatin 2:0, pasi i shënoi të dy golat.
Për Malishevën, kjo ishte fitorja e tretë rresht në po aq ndeshje nën drejtimin e trajnerit të ri, Elon Berisha, duke bërë që të ngjitet në pozitën e katërt në tabelë.
Pasi mori çmimin “Ylli i Javës”, Veliu u shpreh I lumtur që u vlerësua si lojtari më i mirë i javës.
“Nuk e kemi nisur kampionatin në mënyrën më të mirë, por megjithatë me trajnerin e ri po mundohemi të përmirësojmë lojën dhe të kuptojmë filozofinë e tij. Ambiciet tona janë tre vendet e para të tabelës dhe dalja në Evropë”, ka thënë Veliu për faqen zyrtare të FFK-së.
Ai, gjithashtu shtoi se është shumë i gëzuar në aspektin personal pasi arriti ta ndihmoj ekipin me dy gola të shënuar, duke mos harruar që të falënderojë edhe bashkëlojtarët për angazhimin.
