Profesori universitar, Nexhmedin Spahiu ka folur për gjasat e Nismës Socialdemokrate dhe Aleancës për Ardhmërinë e Kosovës për kalimin e pragut në zgjedhjet e 28 dhjetorit nëse nuk hyjnë në zgjedhje.
Këto dy parti në zgjedhjet parlamentare të muajit shkurt të këtij viti ishin në koalicion dhe fituan 7 ulëse në Kuvend.
Sipas, Spahiut Nisma do ta ketë të pamundur të jetë pjesë e Kuvendit nëse nuk garon e vetme.
Ai ka thënë se për këtë parti më mirë do të ishte të shkonte në koalicion me PDK-së, ku tha se lideri i saj, Fatmir Limaj ka një mbështetje ka votuesit e PDK-së.
“Nuk e besoj që e vetme mund ta kalojë pragun, të paktën rezultatet parapake tregojnë se kjo është e pamundur. Por, ai tash duhet me zgjedh mes PDK-së dhe LDK-së”, ka thënë Spahiu në emisionin “InfoNata” në Tëvë1.
Ndërsa, sa i përket AAK-së, ai vlerësoi se do të ishte rrezikim i madh nëse në zgjedhje do të hynte pa ndonjë koalicion ose prurjen e ndonjë figure të rëndësishme.
“Në zgjedhjet e fundit kombëtare, bashkë me Nismën ishte te 6%, tregon që ajo është 4%, që tregon se do të duhej të ketë një përforcim që ta kalojë pragun. Është një lojë me rriskë me u futur në zgjedhje pa ndonjë koalicion dhe pa prurje të reja dhe të fuqishme”, ka thënë Spahiu.
