Hisen Berisha, anëtar i PDK-së, në emisionin “Mesditë” në Tëvë1 ka folur për mundësinë e bashkëpunimit të PDK-së me partitë e tjera dhe për kryeministrin në detyrë, Albin Kurti.
Ai ka theksuar se PDK-ja nuk ka pasur asnjëherë “vija të kuqe” me partitë e tjera.
“PDK-ja nuk është se ka pasur vijat e kuqe me asnjë parti, deri edhe në këto zgjedhje nuk ka pasur. Por ajo që nuk përafron në asnjë aspekt është LVV-ja dhe vet z. Kurti, sepse ai është personi që Shtetet e Bashkuara të Amerikës e kanë deklaruar të papërshtatshëm dhe të pabesueshëm për të operuar tutje,” ka thënë Berisha.
Ai ka shtuar se gjatë këtij viti, partitë opozitare nuk guxojnë të shkelin kornizat që vendosin SHBA-ja në raport me Kosovën, duke theksuar se dialogu strategjik është pezulluar dhe kjo ka ndikuar në fushat kyçe të zhvillimit të shtetit.
“Prandaj nuk do të ketë asnjë afrim me këtë parti për të formuar qeverinë. Kjo nuk është vijë e kuqe,” ka shtuar Berisha.
