Presidenti i Federatës së Futbollit të Zvicrës, Peter Knäbel, ka komentuar largimin e dy prej talenteve më premtues të futbollit zviceran, Leon Avdullahu dhe Albian Hajdari, të cilët zgjodhën të përfaqësojnë Kosovën në arenën ndërkombëtare.
Në një intervistë për televizionin zviceran SRF, Knäbel theksoi se federata ka bërë gjithçka të mundur për t’i mbajtur dyshen në përfaqësuesen helvete.
“Ne bëmë gjithçka. E kam vizituar Leon Avdullahun në Hoffenheim, së bashku me Murat Yakin, por vendimi i tij kishte qenë tashmë i marrë.”
Sipas tij, rasti i Avdullahut dhe Hajdarit ka shërbyer si një sinjal i qartë për rëndësinë e çështjes së lojtarëve me origjinë të dyfishtë. Knäbel zbulon se rreth 70% e lojtarëve në akademitë zvicerane janë me dy shtetësi, çka e rrit konkurrencën ndërkombëtare midis federatave për sigurimin e talenteve.
Presidenti i futbollit zviceran beson se një vendim i hershëm nga ana e lojtarëve do të ishte në dobi të të gjithëve — si të federatave ashtu edhe të vetë futbollistëve. Megjithatë, ai e konsideron të vështirë përcaktimin e një afati të detyrueshëm.
“Një vendim i hershëm do t’i ndihmonte të dyja palët. Por është e vështirë të përcaktosh një datë fikse.”
Rasti i dy talenteve që zgjodhën Kosovën vazhdon të hapë debat në Zvicër, ku gjithnjë e më shumë futbollistë me origjinë të huaj përfaqësojnë potencial të madh për disa kombëtare njëkohësisht. Federata zvicerane duket e vendosur të forcojë strategjinë e saj për të siguruar që lojtarët e rritur në vend të vazhdojnë me fanellën helvete — por gara me federata të tjera vetëm sa po ashpërsohet.
