Bedri Sadikut, tash e 23 vjet, po i mungojnë përballjet me mikun e tij më të mirë, Mesut Gashin. Ky i fundit, gjeti vdekjen në orët e para të mëngjesit të 7 prillit, të vitit 1999.
Kjo pasi forcat e NATO-s, bombarduan objektin e Postës së Vjetër në Prishtinë.
E disa nga predhat, u shpërndanë edhe në shtëpitë e lagjes.
Këtë fat tragjik e pati edhe shtëpia e Mesut Gashit, i cili u vra brenda saj bashkë me gruan dhe tri vajzat.
“Kemi qenë rival të mëdhenj, në atë kohë u llogaritke Mesuti, si shahistët më të mirë të Kosovës. Bile në atë kohë unë s’kam qenë i njohur sa ka qenë Mesuti”, tha Bedri Sadiku, ish-kampion i shahut me klubin “Prishtina”.
Kështu për 20 vjet, Bedri Sadiku e Mesut Gashi i ndjerë, sfiduan njëri tjetrin.
Këto momente, i kujton me emocione ish shahisti i klubit ”Prishtina”.
“Një lojë unë e nxora barazi, një barazim, ku Mesuti e tregonte një emocion të jashtëzakonshëm, se qysh unë mund t’ia nxjerri barazim…5:50 shumë na mungon Mesuti…”, shtoi Sadiku.
Ndërkohë lagjja e njohur si “Të Qafa” në Prishtinë ku edhe ndodhi tragjedia, tashmë ka pamje tjetër.
E njëjtë me të, ka ndryshuar edhe vendi ku dikur jetonte ish-shahisti me familje.
Bajram Selimaj, dhëndri i Mesut Gashit, ka kujtuar momentet kur i treguan se ka ndodhur më e keqja.
“Në momentin kur është bombarduar, të gjitha objektet përreth janë rrënuar, për fat të keq Mesuti me familje ka qenë brenda shtëpisë.Shtëpia është rrënuar, Mesuti me grua dhe tri vajza janë mbetur të vrarë ndërsa djali dhe nëna e tij kanë shpëtuar”, tha Selimaj.
Ndërkohë lajmi për vdekjen e Mesut Gashit me familje, arriti edhe tek miku i tij i ngushtë, Enver Berisha, i cili ndodhej në Maqedoninë e Veriut.
Posta e Vjetër që ndodhej afër objektit aktual të qeverisë, në atë kohë po sherbente edhe si objekt ushtarako-policor i forcave serbe.
Ndryshe, që nga paslufta, mbahet edhe turneu memorial “Mesut Gashi” ku mjeshtër të mëdhenj të shahut sfidojnë njëri-tjetrin.
Raporti i gazetarit Fidan Zejnullahu.