Kapiteni i Sllovakisë, Milan Shkriniar, ka folur fjalë të mëdha për Kosovën të enjten pas shortit të tërhequr në Cyrih të Zvicrës.
Ndeshja gjysmëfinale e plejofit për Botërorin në SHBA, Meksikë e Kanada, ndërmjet Sllovakisë dhe Kosovës do të zhvillohet më 26 mars. Fituesja e ndeshjes do të paraqitet në finale të plejofit.
“Nga të gjithë katër kundërshtarët ka qenë e vështirë të gjejmë një ekip me më pak kualitet. Të gjitha janë ekipe të balancuara. Kosova ka bërë kualifikime të shkëlqyera dhe nuk do ta kemi lehtë. Ambienti në shtëpi pa dyshim se do të jetë avantazh. Me stadiumin e mbushur plot, ne do të japim 100 për qind nga vetja dhe do të përjetojmë mbrëmje magjike. Bashkë me tifozët tanë do të shkojmë afër arritjes së synimit të madh që kemi. Shihemi në mars!”, ka deklaruar Shkriniar për faqen zyrtare të Federatës së Futbollit të Sllovakisë.
Ndërkohë sulmuesi i Slavia Pragës, Ivan Schranz, ka thënë pas shortit se nuk e njeh shumë Kosovën.
“Ne do të luajmë kundër Kosovës, kështu që e pranoj, edhe pse nuk di shumë për këtë përfaqësuese për momentin. Por deri në muajin mars do të kemi mjaftueshëm informata dhe do ta analizojmë në mënyrë të përkryer. Jam i lumtur që do të luajmë në shtëpi. Besoj se tifozët do të jenë në numër të madh dhe do të na përkrahin”, ka deklaruar Schranz.
Ndihmëstrajneri i përfaqësueses së Sllovakisë, Simone Bonomi, ka thënë se Kosova është kundërshtare e fortë. Sllovakia dhe Kosova do të përballen në gjysmëfinale të plejofit për Kupën e Botës 2026. Sllovakia dhe Kosova do të përballen për herë të parë kundër njëra-tjetrës.
“Kosova është pa dyshim një kundërshtare e pakëndshme. Në kualifikuese, ata e mposhtën Suedinë dy herë, gjithashtu fituan ndaj Sllovenisë, ekipe që i njohim. Ata kanë lojtarë shumë të mirë si Rrahmani, Muriqi, Vojvoda dhe të tjerë. Për herë të parë ata janë kaq afër avancimit në Kupën e Botës, gjë që me siguri do t’u japë lojtarëve të tyre entuziazëm të madh. Fakti që po luajmë në shtëpi mund të jetë një avantazh për ne”, ka thënë Bonomi për Federatën e Futbollit të Sllovakisë.
“Fakti që të gjithë pjesëmarrësit në plejof kaluan nëpër një kualifikim të vështirë flet shumë për cilësinë e tyre. Kjo është arsyeja pse ishte e vështirë të urojmë dikë si kundërshtar. Kosova është një rivale e panjohur për ne, por bazuar në rezultatet në kualifikime, duhet ta respektojmë që është një ekip i fortë. Fakti që do ta luanim edhe ndeshjen e dytë, finalen e plejofit, në shtëpi, na kënaq, nuk kemi pse të udhëtojmë drejt kundërshtarit për ndeshjen vendimtare. Do të njoftojmë se ku do të luhet ndeshja deri më 26 nëntor. Pra, kemi ende pak kohë, do të mendojmë për mundësitë reale dhe do ta informojmë publikun”, ka thënë Palençik.
Sllovakia i mbylli në vendin e dytë kualifikimet në grup me Gjermaninë. Gjermania i mblodhi 15 pikë, Sllovakia 12, Irlanda e Veriut nëntë dhe Luksemburgu mbeti pa pikë.
