Kryeministri në detyrë, Albin Kurti, ka mirëpritur vendimin e Presidentes Vjosa Osmani për caktimin e datës së zgjedhjeve të reja parlamentare në Kosovë, duke e cilësuar këtë si një festë të demokracisë.
Në një postim në Facebook, Kurti ka theksuar se pjesëmarrja e madhe e qytetarëve me të drejtë vote e bën ditën e zgjedhjeve edhe më të veçantë.
Ai ka shtuar se është e rëndësishme që institucionet shtetërore të kenë kohën e nevojshme për përgatitjet e duhura, në mënyrë që procesi zgjedhor të zhvillohet në mënyrë të rregullt, të drejtë dhe demokratike.
“Dita e zgjedhjeve është festë e demokracisë. Ajo bëhet edhe më madhështore kur ka pjesëmarrje sa më të madhe të qytetarëve tanë me të drejtë vote. Në të njëjtën kohë, duhet të sigurohemi që institucionet shtetërore kanë kohën e mjaftueshme për të bërë të gjitha përgatitjet e nevojshme që procesi zgjedhor të jetë i rregullt, i drejtë dhe demokratik. Andaj, ne e mirëpresim caktimin e datës 28 dhjetor nga Presidentja e vendit, Vjosa Osmani-Sadriu, si datën më të përshtatshme për zgjedhjet e parakohshme që po na presin”, ka shkruar ai në Facebook.
Ndryshe, Presidentja Vjosa Osmani, pas takimit që mbajti të enjten me përfaqësuesit e partive politike ka thënë se ka vendosur që zgjedhjet e jashtëzakonshme do të mbahen më 28 dhjetor.
Osmani ka treguar se tetë parti ishin për datën 28 dhjetor, pesë për 21 dhjetorin dhe tri parti thanë se cilado datë është në rregull për ta.
Osmani cakton datën 28 dhjetor për zgjedhjet e jashtëzakonshme
