Përkundër thirrjes për pjesëmarrje në Kuvend – PDK, LDK, AAK dhe Nisma, përfshirë edhe Listën Serbe nuk kanë pranuar që të jenë prezentë në seancën e jashtëzakonshme të thirrur nga LVV-ja.
Rrjedhojë e kësaj, sot nuk ka arritur miratimi i buxhetit vjetor i shtetit për vitin 2026, marrëveshjet ndërkombëtare, buxheti për tri komuna dhe për Radio Televizionin e Kosovës.
Seanca nisi pas orës 11:00, dhe e njëjta mbet e hapur pas thirrjes për pjesëmarrje.
Gjatë fjalimit, kryeministri në detyrë, Albin Kurti, deklaroi se nëse marrëveshjet ndërkombëtare nuk votohen sot, atëherë Kosova do t’i humbë 200 milionë euro.
Ndërkaq, nga opozita i vetmi që hyri në sallë ishte deputeti i PDK-së, Përparim Gruda – i cili tha se pjesëmarrja e tij do të jetë vetëm për ta paraqitur qëndrimin e subjektit politik.
Ai këtë seancë në pozitën e juristit e cilësoi si antikushtetuese.
Kundërpërgjigje ndaj tij, pati ministri në detyrë i Financave, Hekuran Murati, i cili tha se seanca ishte e jashtëzakonshme dhe nuk kishte shkelje të Kushtetutës së Kosovës.
Ndërkaq, të njëjtat subjekte politike kanë bërë të ditur se votë nuk kanë as për mandatarin Glauk Konjufcën.
Sot është afati i fundit i Konjufcës dhe rrjedhimisht nëse s’ka votë pro atëherë vendi shkon drejt zgjedhjeve të reja. /teve1.info/
