Qytetarët serbë që jetojnë në Kosovë morën pjesë në zgjedhjet lokale që u mbajtën me 9 nëntor.
Sipas rezultateve preliminare nga Komisioni Qendror i Zgjedhjeve, Lista Serbe i ka fituar 10 komuna me shumicë serbe.
Nga Komisioni Evropian ditë më parë deklaruan se do të hiqen masat ndëshkuese ndaj Kosovës, nëse në veri arrihet një transfer i rregullt i pushtetit dhe deeskalimi mbetet i qëndrushëm.
Për këtë çështje ka folur gjatë së martës edhe zëdhënësja për politikën e jashtme të BE-së, Anitta Hipper.
“Pra, sa i përket zgjedhjeve, ne e mirëpresim zhvillimin e rregullt dhe gjithëpërfshirës të raundit të dytë të zgjedhjeve për kryetarë komunash të dielën, dhe gjithashtu bëjmë thirrje për certifikimin dhe zbatimin e shpejtë të rezultateve të zgjedhjeve. Sa i përket masave që lidhen me përpjekjet për de-përshkallëzim në veri të Kosovës, Komisioni tashmë ka ndërmarrë disa hapa për t’i hequr gradualisht masat që janë vendosur. Më konkretisht, Komisioni i ka ri-paraqitur katër projekte të asistencës teknike për investime të mundshme të ardhshme në kuadër të mekanizmit të reformës dhe rritjes, ndërsa hapat e ardhshëm mbeten të kushtëzuar me vazhdimin e përpjekjeve për ruajtjen e qetësisë në veri”, ka thënë Hipper.
Por, eurodeputeti holandez, Thijs Reuten gjatë një intervistë për Tëvë1 thotë mes tjerash se masat ndëshkuese ndaj Kosovës duhet të hiqen sa më parë.
“Masat e BE-së ndaj Kosovës nuk është dashur të vendoseshin fare dhe, sipas mendimit tim, është dashur të hiqeshin shumë kohë më parë. Tani që zgjedhjet lokale në Kosovë, përfshirë edhe në veri, kanë përfunduar dhe kryetarët e rinj pritet të marrin detyrat e tyre, ky është momenti i duhur që Komisioni Evropian të shpallë sa më parë heqjen e sanksioneve, e më pas Këshilli ta miratojë këtë vendim”, është shprehur Reuten.
Tutje, Reuten është shprehur kritik për qëndrimet e BE-së karshi Serbisë.
“Vetë masat kanë qenë në kontrast të thellë me qëndrimin e Bashkimit Evropian ndaj Serbisë, e cila në mënyrë aktive ka destabilizuar rajonin dhe ka rrezikuar vazhdimisht marrëdhëniet ndërshtetërore. Qëllimi i përgjithshëm tani duhet të jetë “të kthejmë faqen” nga të gjitha palët, që do të thotë se llogarisim edhe në angazhim konstruktiv nga ana e Kosovës. Të kthesh faqen do të thotë të punosh për të ardhmen dhe të angazhohesh në mënyrë konstruktive në të gjitha fushat”, ka theksuar Reuten.
Kujtojmë që Bashkimi Evropian e ndëshkoi Kosovën në qershor të vitit 2023, për shkak të, siç vlerësoi, rolit të Qeverisë së Kosovës në nxitjen e tensioneve etnike në veri të vendit.
