Luftimet e ashpra në Sudanin qendror kanë zhvendosur rreth 2,000 persona gjatë tre ditëve të fundit, tha të hënën agjencia e OKB-së për migracionin.
Organizata Ndërkombëtare për Migracionin (IOM) tha se të zhvendosurit ikën nga disa qytete dhe fshatra në zonën e Barës në provincën e Kordofanit të Veriut midis të premtes dhe të dielës.
Kordofani ka qenë një nga dy zonat, së bashku me rajonin perëndimor të Darfurit, që kohët e fundit u bënë epiqendra e luftës midis ushtrisë sudaneze dhe Forcave të saj paraushtarake rivale të Mbështetjes së Shpejtë.
Sipas grupeve të ndihmës dhe zyrtarëve të OKB-së, kapja e qytetit kyç të el-Fasher nga RSF- ja la qindra të vdekur dhe detyroi dhjetëra mijëra të iknin në kampe të mbipopulluara për t’i shpëtuar mizorive të raportuara nga forcat paraushtarake .
IOM tha se gati 92,000 njerëz janë larguar nga el-Fasheri dhe fshatrat përreth, raporton Associated Press.
Lufta midis RSF-së dhe ushtrisë filloi në vitin 2023 , kur shpërthyen tensionet midis dy ish-aleatëve që duhej të mbikëqyrnin një tranzicion demokratik pas një kryengritjeje të vitit 2019.
Luftimet kanë vrarë të paktën 40,000 njerëz, sipas Organizatës Botërore të Shëndetësisë, dhe kanë zhvendosur 12 milionë. Megjithatë, grupet e ndihmës thonë se numri i vërtetë i të vdekurve mund të jetë shumë herë më i lartë.
