Qindra civilë u varrosën në varre masive dhe të tjerë u dogjën nga Forcat paraushtarake të Mbështetjes së Shpejtë (RSF) në qytetin El-Fasher në Sudanin perëndimor, kanë thënë të dielën mjekët vendas.
“RSF ka mbledhur qindra trupa nga rrugët dhe lagjet e qytetit dhe ka varrosur disa në varre masive dhe ka djegur të tjerë në një përpjekje të dëshpëruar për të fshehur provat e krimeve të tyre kundër civilëve”, tha Rrjeti i Mjekëve të Sudanit në një deklaratë.
Ajo e quajti varrimin e civilëve një “gjenocid të plotë” dhe një “shkelje të të gjitha normave ndërkombëtare dhe fetare që ndalojnë gjymtimin e kufomave dhe u garantojnë të vdekurve të drejtën për një varrim dinjitoz”.
“Situata në El-Fasher ka shkuar përtej një katastrofe humanitare dhe është shndërruar në një gjenocid sistematik, duke synuar jetën dhe dinjitetin njerëzor mes një heshtjeje të tmerrshme ndërkombëtare që përbën bashkëfajësi”, thuhet në deklaratë.
“Krimet e RSF-së nuk mund të fshihen duke varrosur ose djegur”, tha grupi mjekësor, duke i bërë thirrje bashkësisë ndërkombëtare të ndërmarrë veprime të menjëhershme për të nisur një hetim të pavarur ndërkombëtar për mizoritë kundër civilëve në El-Fasher, citon Anadolu.
Më 26 tetor, RSF-ja mori kontrollin e El-Fasher, kryeqytetit të Darfurit të Veriut, dhe kreu masakra me bazë etnike, sipas organizatave lokale dhe ndërkombëtare, mes paralajmërimeve se sulmi mund të thellonte ndarjen gjeografike të vendit.
Që nga 15 prilli 2023, ushtria sudaneze dhe RSF-ja janë përfshirë në një luftë që ndërmjetësimet rajonale dhe ndërkombëtare nuk kanë arritur ta përfundojnë. Konflikti ka vrarë mijëra njerëz dhe ka zhvendosur miliona të tjerë.
