Ministri i Jashtëm rus, Sergej Lavrov, ka deklaruar të martën se Moska është e gatshme të përfshijë zotimin e saj për të mos sulmuar asnjë shtet anëtar të NATO-s apo BE-së në garancitë e ardhshme të sigurisë.
“Ne kemi deklaruar vazhdimisht se nuk kemi pasur dhe nuk kemi kurrë qëllime për të sulmuar ndonjë shtet anëtar aktual të NATO-s ose BE-së. Ne jemi të përgatitur ta përfshijmë këtë qëndrim në garancitë e ardhshme të sigurisë për këtë pjesë të Euroazisë”, tha Lavrov gjatë një fjalimi në seancën plenare të Konferencës së 3-të Ndërkombëtare mbi Sigurinë Euroaziatike, që u mbajt në kryeqytetin e Bjellorusisë, Minsk.
Në këtë kuadër, Lavrov theksoi se udhëheqësit e BE-së po shmangin dialogun e drejtpërdrejtë me Rusinë dhe në vend të kësaj po kërkojnë garanci sigurie kundër saj pas konfliktit.
Ai shtoi se Rusia dëshiron që Arktiku të mbetet “një rajon paqeje dhe bashkëpunimi”, por paralajmëroi se planet e NATO-s për të forcuar praninë në këtë zonë “nuk mund të mos ngrenë shqetësime”.
Lavrov akuzoi gjithashtu NATO-n për zgjerim drejt rajonit të Azi-Paqësorit, me synimin për të “përmbajtur Kinën, izoluar Rusinë dhe përballur Korenë e Veriut”, duke fajësuar Perëndimin për përgatitjen e një “lufte të re të madhe evropiane”.
Shefi i diplomacisë ruse përsëriti pretendimin e Moskës se vendet evropiane të NATO-s po zgjasin qëllimisht luftën midis Rusisë dhe Ukrainës, ka cituar Anadolu.
Ai theksoi se shumica prej tyre po bëjnë “gjithçka që është në fuqinë e tyre” për të bindur Uashingtonin të heqë dorë nga ideja e zgjidhjes së konfliktit që zgjat tashmë më shumë se tre vjet e gjysmë.
“Shpresojmë që Presidenti i SHBA-së, Donald Trump, të mbetet sinqerisht i përkushtuar për zgjidhjen e krizës ukrainase dhe do të mbetet i përkushtuar ndaj parimeve të zhvilluara në samitin e Anchorage, të cilat bazoheshin në propozimet amerikane”, shtoi ai.
