Një grup militant kurd ka njoftuar të dielën se po tërheq luftëtarët e tij nga Turqia në Irak, si pjesë e një përpjekjeje paqeje me Turqinë.
Deklarata e lëshuar në Irakun verior nga Partia e Punëtorëve të Kurdistanit , ose PKK, erdhi muaj pasi një grup luftëtarësh të saj filluan të dorëzonin armët në një ceremoni simbolike, si pjesë e procesit të paqes.
Grupi ka zhvilluar një kryengritje dekadash në Turqi që ka çuar në dhjetëra mijëra vdekje që nga vitet 1980.
“Për të parandaluar çdo rrezik përleshjesh ose provokimesh, ne aktualisht po tërheqim të gjitha forcat tona brenda Turqisë në Zonën e Mbrojtjes së Medyas me miratimin e Abdullah Oçalanit”, tha në një deklaratë Sabri Ok, një anëtar i organizatës ombrellë kurde, Unionit të Komuniteteve të Kurdistanit, duke iu referuar udhëheqësit të burgosur të grupit.
Zona e Mbrojtjes së Medyas është një term i përdorur shpesh nga PKK për të përshkruar zonat në Irakun verior.
“Gjithashtu, masa të ngjashme rregullatore po merren në lidhje me ato pozicione përgjatë kufirit të cilat mund të mbartin rrezikun e përplasjeve dhe provokimeve të mundshme”, tha Ok.
Deklarata bëri thirrje gjithashtu për lëshime ligjore dhe politike nga ana e shtetit turk, shkruan AP.
PKK-ja njoftoi në maj se do të shpërbëhej dhe do të hiqte dorë nga konflikti i armatosur, duke i dhënë fund katër dekadave armiqësi.
