Kryeministri i Izraelit e ashpërsoi qëndrimin e tij të mërkurën duke deklaruar se vendi i tij është përgjegjës për sigurinë e vet dhe nuk është një protektorat amerikan, ndërsa përgatitej të diskutonte progresin në marrëveshjen e brishtë të armëpushimit në Gaza me zëvendëspresidentin e SHBA-së JD Vance.
Komentet e kryeministrit Benjamin Netanyahu përpara takimit të tij me Vance duket se synonin të lehtësonin shqetësimet publike se prania e një force ndërkombëtare sigurie të parashikuar në Gaza mund të kufizonte aftësinë e Izraelit për të sulmuar territorin e shkatërruar.
“Ne nuk jemi një protektorat i Shteteve të Bashkuara. Izraeli është ai që do të vendosë për sigurinë e tij”, tha Netanyahu në një deklaratë të lëshuar nga zyra e tij ndërsa po shkonte drejt takimit, raporton AP.
Duke folur me gazetarët para fillimit të takimit, Vance pranoi se rruga drejt paqes është e mbushur me pengesa të mëdha, por në të njëjtën kohë u përpoq të ruante tonin optimist që shprehu të martën me mbërritjen e tij në Izrael.
Ndërkohë, qeveria izraelite njoftoi se Sekretari i Shtetit i SHBA-së, Marco Rubio, do të udhëtojë për në Izrael për t’u takuar me Netanyahun të premten.
