Kryeministri palestinez Mohammad Mustafa tha të enjten se qeveria e tij, në partneritet me ekspertë arabë dhe ndërkombëtarë, ka zhvilluar një plan trefazësh për rimëkëmbjen dhe rindërtimin e Gazës, i cili vlerësohet të kushtojë 67 miliardë dollarë dhe të zgjasë pesë vjet.
Duke folur në një konferencë për shtyp në Ramallah përpara një takimi të posaçëm mbi planin e rimëkëmbjes, Mustafa tha se iniciativa synon të rindërtojë Rripin e Gazës të shkatërruar nga lufta, pas gati dy vitesh sulmesh izraelite që kanë lënë dhjetëra mijëra të vdekur dhe shkatërrime masive në të gjithë enklavën.
Në këtë aktivitet morën pjesë diplomatë dhe përfaqësues të institucioneve ndërkombëtare.
Mustafa përshkroi se faza e parë, e përqendruar në përmbushjen e nevojave urgjente humanitare dhe infrastrukturore, do të zgjasë gjashtë muaj me një kosto prej 3.5 miliardë dollarësh.
Faza e dytë, që do të zgjasë tre vjet, do të kërkojë 30 miliardë dollarë, ndërsa faza përfundimtare do të përqendrohet në përfundimin e rindërtimit dhe rimëkëmbjen afatgjatë.
Ai tha se bisedimet janë duke vazhduar me partnerët ndërkombëtarë për të siguruar burime për zbatimin e planit, duke shtuar se një konferencë e madhe për rindërtim do të mbahet në Egjipt një muaj pas përfundimit të luftës.
Kryeministri theksoi se Izraeli duhet të përmbushë detyrimet e tij duke u tërhequr nga Gaza, duke hapur pikat kufitare dhe duke lejuar hyrjen e ndihmës humanitare dhe materialeve të rindërtimit. /Anadolu
