Klubi futbollistik Dukagjini ka arritur të marrë një pikë të vlefshme në fundin dramatik të përballjes ndaj Drenicës, në kuadër të javës së pestë të Superligës së Kosovës.
Ishte Albion Pllana që u shndërrua në heroin e skuadrës së Ismet Munishit, duke shënuar në minutën e 90+2’, me një goditje fantastike “vollej”, që la të shtangur portierin vendas dhe vulosi rezultatin përfundimtar 1-1.
Drenica zhvilloi një ndeshje të mirë dhe dominoi për pjesën më të madhe të lojës, duke krijuar disa aksione të rrezikshme në portën e mysafirëve. Epërsia erdhi pas 68 minutash, kur Igball Jashari realizoi një supergol që ndezi stadiumin në Skënderaj.
Megjithatë, Dukagjini – lider aktual i Superligës – nuk u dorëzua dhe arriti të shpëtojë një pikë në çastet e fundit të takimit.
Pas këtij barazimi, Dukagjini shkon në kuotën e 10 pikëve, aq sa ka edhe Prishtina, ndërsa Drenica mbetet me shtatë pikë në renditje.
