Kryetarja e Kuvendit të Kosovës, Albulena Haxhiu, është takuar të martën me ambasadorin e OSBE-së në Kosovë, Gerard McGurk.
Përmes një njoftimi, Haxhiu bëri të ditur se gjatë takimit është zhvilluar një bisedë për çështje me interes të përbashkët, duke përfshirë të drejtat dhe sigurinë e grave, fuqizimin e të rinjve, lirinë e medias dhe reformën zgjedhore.
Vëmendje e veçantë, sipas saj, i është kushtuar agjendës parlamentare për barazinë gjinore dhe rolit të Kuvendit në mbikëqyrjen e institucioneve, si dhe në parandalimin e dhunës ndaj grave.
“Diskutuam për të drejtat dhe sigurinë e grave, fuqizimin e të rinjve, lirinë e medias dhe reformën zgjedhore. Vëmendje të veçantë i kushtuam agjendës parlamentare për barazinë gjinore dhe rolit të Kuvendit në mbikëqyrjen e institucioneve dhe parandalimin e dhunës ndaj grave”, ka shkruar ajo në Facebook.
Gjithashtu, në takim është diskutuar për prioritetet legjislative të Kuvendit dhe mundësitë për mbështetjen e tyre.
Haxhiu e ka cilësuar takimin si një bisedë të hapur dhe përmbajtjesore, duke theksuar rëndësinë e angazhimit të përbashkët për çështjet e diskutuara./teve1.info/
