Afër 500 zyrtarë policorë janë me sëmundje kronike e 130 janë me sëmundje të rëndë.
Por, këta punonjës të Policisë së Kosovës detyrohen që të paraqiten në vendin e tyre të punës.
Kjo si pasojë e mungesë së sigurimit shëndetësor e invalidor, që do t’ua mundësonte atyre lehtësimin në detyrë.
Se çfarë po ndodhë me këtë projektligj, tëvë1 ka pyetur edhe Ministrinë e Punëve të Brendshme dhe menaxhmentin e Policisë së Kosovës.
Por, asnjë nga këto institucione nuk i janë përgjigjur interesimit të televizionit.
Nga Sindikata e Policisë së Kosovës thonë se vazhdimisht kanë kërkuar që kjo çështje të jetë jetike për Qeveritë, pasi që prezenca e këtyre policëve me sëmundje vetëm se vështirësojnë punën e këtij institucioni.
“Sepse këta zyrtarë figurojnë si numër, por nuk mund të angazhohen në kryerjen e detyrave për arsye shëndetësore. Sindikata e Policisë së Kosovës ka ofruar edhe alternativa për sigurimin shëndetësor, ku kemi kërkuar nga Qeveria mbështetje financiare prej rreth 4.5 milionë eurosh në vit për të gjithë zyrtarët policorë, duke e konsideruar këtë një shumë jo të madhe krahasuar me rëndësinë e sigurimit të gjithë zyrtarëve”, thuhet nga Sindikata.
Nënkoloneli në pension i Policisë, Refki Morina thotë se mungesa e sigurimit shëndetësor ndikon negativisht andaj kërkon edhe zbatim të marrëveshjes për shërbime shëndetësore.
“Mosrealizimi i kësaj marrëveshjeje dhe mosrealizimi i shërbimeve shëndetësore në raport me Policinë ndikon shumë keq në demotivimin e pjesëtarëve të Policisë së Kosovës. Dmth hiqet nga ajo për arsye se shpesh herë ose të shumtën e rasteve çdo i dyti ose i treti pjesëtar i Policisë së Kosovës mund të ballafaqohet me shëndetin për shkak të rëndësisë së punëve, rrezikshmërisë së punëve, stresit të vazhdueshëm në punë varësisht prej njësive që ata veprojnë dhe punojnë”, deklaroi Morina.
Në nëntor të vitit 2023 menaxhmenti i Policisë dhe Shërbimit Spitalor Klinik Universitar të Kosovës kishin nënshkruar një marrëveshje.
Aty synohej që personelit policorë dhe rekrutëve do të iu ofrohen me prioritet dhe pa pagesë shërbimet mjekësore, psikologjike dhe specialistike të nivelit dytësor dhe tretësor në ShSKUK dhe në të gjitha Spitalet Rajonale.
