Një bunar 18 metra i thellë qëndron i hapur në oborrin e një familjeje në fshatin Rimanishtë të Prishtinës.
Si i tillë, është shndërruar në një burim jetik për nevojat e përditshme të familjes.
Edhe pse zgjidh vetëm pjesërisht problemet e tyre me ujin, kjo thellësi e improvizuar tregon për mënyrat me të cilat banorët përpiqen të përballojnë mungesën e ujit të pijshëm në këtë fshat.
Banorja Emine Musliu tregon për vështirësitë që i sjell mungesa e ujit në përditshmërinë e saj.
“Ujë nuk kom, prej kojshisë po marr qeshtu që se di sa, me la tesha e krejt. Me ramje të lirë na vike kisha ujë tash mo nuk kom”, tregoi banorja Emine Musliu.
Hall të njëjtë kanë edhe disa banorë të tjerë.
“Problem serioz është se tash kohëve të fundit në qet muajin gusht edhe shtator s’ka, bajnë njerëzit me cisternë me shishe atje në fillim është një qeshme aty parkohen kerret edhe marrin njerëzit ujë për nevojat e veta e për pije ma lehtë e blejnë ujin a per larje e sene kanë edhe kafshë e ferma, njerëzit ata vujnë për ujë”, tha banori Ismet Arifi.
“Krejt fshati ka mungesë, 100 shtëpi janë pa ujë qeshtu me bure tu i bajt me bunara do presin s’kanë ka me marrë e s’ka Komuna e Prishtinës pos Sharbani e Rimanishta janë pa ujë, se gjithka kanë ujë po qekjo ka mbetë mas dore e çka u bë me të nuk e di”, tregoi Fehmi Arifi.
Megjithatë nga KRU Prishtina thonë se për këtë problem duhet të drejtohen në Komunë.
“Për lagje ose fshatra që nuk kanë rrjet të ujësjellësit përgjegjës janë Komunat. KRU Prishtina është përgjegjëse vetëm për mirëmbajtjen e rrjetit aktual dhe furnizimin me ujë. Ata duhet të drejtohen në Komunën e Prishtinës për projekte të ujësjellësit”, tha Arjeta Mjeku-Aziti nga KRU “Prishtina”.
Por në anën tjetër nga Komuna e Prishtinës thanë për televizionin se do të ndajnë mjete, atëherë kur KRU Prishtina gjen një zgjidhje.
“Komuna e Prishtinës do të ndajë mjetet menjëherë sapo ujësjellësi të propozojë zgjidhjen teknike”.
Diku rreth 100 shtëpi në fshatin Rimanishtë vazhdojnë të mbeten pa ujë të pijshëm.
Banorët kërkojnë veprime konkrete nga komuna për të siguruar furnizim të rregullt.
