Televizioni Tëvë1 i ka dërguar pyetje Lëvizjes Vetëvendosje lidhur me nismën e PDK-së për ndryshimin dhe plotësimin e Ligjit për Dhomat e Specializuara të Kosovës. Nga LVV-ja kanë kthyer përgjigje duke theksuar se çështja duhet të trajtohet me kujdes dhe se, fillimisht, duhet të pritet vendimi i Gjykatës Kushtetuese lidhur me konstituimin e Kuvendit.
Në përgjigjen e dërguar për Tëvë1, LVV-ja i ka paraqitur qëndrimet e saj në tri pika.
1. Pritja e vendimit të Gjykatës Kushtetuese
LVV-ja ka thënë se pret që Gjykata Kushtetuese të vendosë lidhur me çështjen e konstituimit të Kuvendit, duke theksuar se kërkesa e parashtruar në Gjykatë nuk është tërhequr.
“Presim që Gjykata Kushtetuese të vendosë lidhur me çështjen e konstituimit të Kuvendit, duke pasur parasysh se kërkesa e parashtruar në Gjykatë nuk është tërhequr. Për këtë arsye, konsiderojmë të nevojshme që fillimisht të pritet vendimi i Gjykatës dhe të vlerësohen implikimet juridike që mund të dalin prej tij”, thuhet në përgjigjen e LVV-së.
2. Shqyrtimi juridik i propozimit
Sa i përket nismës për ndryshimin dhe plotësimin e ligjit, LVV-ja ka deklaruar se do ta shqyrtojë atë nga aspekti juridik, duke përfshirë përputhshmërinë me kornizën ligjore në fuqi dhe efektet e mundshme që mund të ketë në procedurat pranë Dhomave të Specializuara.
“Sa i përket propozimit për ndryshimin dhe plotësimin e ligjit, LVV do ta shqyrtojë atë me kujdes nga aspekti juridik, përfshirë përputhshmërinë e tij me kornizën ligjore në fuqi dhe efektet që një ndërhyrje e tillë eventualisht mund të ketë në këtë fazë të procedurave pranë Dhomave të Specializuara”, thuhet në përgjigje.
LVV-ja ka theksuar gjithashtu se, meqë procedurat ndaj katër ish-krerëve të UÇK-së zhvillohen me ekipe të veçanta të mbrojtjes, çdo iniciativë duhet të vlerësohet edhe në raport me interesat dhe strategjitë juridike të secilit rast.
3. Qasje institucionale dhe shtetërore e koordinuar
Në pikën e tretë, LVV-ja ka vlerësuar se në këtë fazë është më e rëndësishme të ndërtohet një qasje institucionale dhe shtetërore e koordinuar, e mbështetur në analizë të plotë juridike.
“Çdo veprim duhet të ndërmerret vetëm pasi të jenë vlerësuar me kujdes pasojat e tij të mundshme juridike, veçanërisht në raport me procedurën në shkallë të dytë, përkatësisht procedurën e apelit. Qëllimi duhet të jetë që veprimet institucionale të jenë të menduara, të bashkërenduara dhe të mos krijojnë pasoja të padëshiruara për proceset gjyqësore në zhvillim”, thuhet në përgjigjen e LVV-së për Tëvë1.
