Instituti Shqiptaro Evropian dhe Oda Ekonomike Shqiptare kanë njoftuar qytetarët e Republikës së Kosovës se së shpejti do të fillojë mbledhja e 10 mijë nënshkrimeve qytetare për inicimin e procedurës kushtetuese dhe ligjore për një referendum lidhur me të ardhmen e Dhomave të Specializuara të Kosovës dhe Zyrës së Prokurorit të Specializuar.
Në njoftimin e tyre thuhet se kjo nismë synon që çështja të trajtohet përmes mekanizmave demokratikë, kushtetues dhe institucionalë.
“Instituti Shqiptaro Evropian dhe Oda Ekonomike Shqiptare njoftojnë qytetarët e Republikës së Kosovës se së shpejti do të fillojmë mbledhjen e 10,000 nënshkrimeve qytetare për inicimin e procedurës kushtetuese dhe ligjore për një referendum lidhur me të ardhmen e Dhomave të Specializuara të Kosovës dhe Zyrës së Prokurorit të Specializuar”, thuhet në njoftim.
Sipas tyre, qëllimi i kësaj nisme është që çështja të trajtohet përmes mekanizmave demokratikë, kushtetues dhe institucionalë, duke kërkuar nga Kuvendi i Republikës së Kosovës shqyrtimin e procedurës dhe të përputhshmërisë së saj me Kushtetutën, përfshirë nenin 162, si dhe me detyrimet ndërkombëtare të Republikës së Kosovës.
“Mbledhja e nënshkrimeve do të zhvillohet në hapësira publike të përcaktuara për këtë qëllim. 10,000 nënshkrime për një proces demokratik dhe institucional”, thuhet më tej në njoftimin e Institutit Shqiptaro Evropian dhe Odës Ekonomike Shqiptare.
Organizatorët kanë bërë të ditur se detajet lidhur me datën, orën dhe lokacionin e mbledhjes së nënshkrimeve do të bëhen publike së shpejti.
