Google është gjobitur me më shumë se 400 milionë euro për mënyrën se si ka përpunuar të dhënat e vendndodhjes së përdoruesve, pas pretendimeve se gjigandi i teknologjisë i kishte manipuluar përdoruesit që të pranonin të gjurmoheshin vazhdimisht në telefonat e tyre celularë.
Gjoba, e vendosur nga Komisioni i Mbrojtjes së të Dhënave (DPC) i Irlandës, vjen pas ankesave nga organizata të shumta evropiane të konsumatorëve se Google po ndiqte çdo hap që ndërmerrnin përdoruesit.
Reklamat që lidhen me vendndodhjen janë të njohura për pushuesit, por shtatë organizata evropiane të konsumatorëve janë ankuar se përdorimi i tepërt i të dhënave të vendndodhjes mund të çojë gjithashtu në shkelje të privatësisë .
Hetimi i DPC u nxit nga një hulumtim i agjencisë norvegjeze të konsumatorëve në vitin 2018, i cili sugjeroi se të dhënat e vendndodhjes mund të zbulonin detaje të tilla si besimet fetare (duke ndjekur vendet e kultit), prirjet politike (për shembull, duke ditur se një përdorues ka shkuar në demonstrata), gjendjet shëndetësore (nëse një përdorues ka shkuar në spital) dhe orientimin seksual (nëse ka shkuar në bare të caktuara).
DPC nisi hetimin e saj gjashtë vjet më parë dhe nisi të zbulonte nëse Google kishte një bazë të vlefshme ligjore për përdorimin e të dhënave të vendndodhjes.
Ai zbuloi se përdoruesit e Google mund të mos kenë qenë në dijeni se vendndodhja e tyre po përdorej për t’i ndikuar me anë të reklamave ose për të mbledhur detaje rreth shëndetit dhe interesave të tyre.
Organizata Evropiane e Konsumatorëve (BEUC) e bazoi ankesën e saj në një hulumtim nga Forbrukerrådet, agjencia norvegjeze e konsumatorëve, e cila pretendoi se Google përdori “truke të ndryshme” për të siguruar që historiku i vendndodhjes dhe aktiviteti i uebit dhe i aplikacioneve të ishin të aktivizuara.
“Sot shënon një moment të rëndësishëm në përpjekjet për të mbrojtur të drejtat tona në internet. Njerëzit duhet të jenë në gjendje të kuptojnë se për çfarë po bien dakord pa u mashtruar ose manipuluar që të bëjnë zgjedhje që përndryshe nuk do t’i kishin bërë kurrë”, thotë Finn Myrstad, drejtor i politikave dixhitale në Këshillin Norvegjez të Konsumatorëve.
BEUC tha se të dhënat e gjeolokacionit ishin “një nga format më pushtuese të mbikëqyrjes së konsumatorit”.
Duke vendosur një gjobë prej 403 milionë eurosh, DPC urdhëroi Google që përpunimin e të dhënave ta përputhë me rregulloren e përgjithshme të BE-së për mbrojtjen e të dhënave (GDPR) brenda gjashtë muajve.
Është gjoba e katërt më e madhe e vendosur nga rregullatori irlandez, i cili ka përgjegjësi në të gjithë BE-në për të gjithë gjigantët e teknologjisë amerikane me selinë e BE-së në Irlandë.
Më parë i ka gjobitur Metës me 1.2 miliardë euro, TikTok-ut me 530 milionë euro dhe Instagram-it (gjithashtu në pronësi të Metës) me 405 milionë euro.
Ekzistojnë tre hetime të tjera statutore në shkallë të gjerë që janë në vazhdim e sipër dhe që kanë të bëjnë me Google, të cilat janë të gjitha në një fazë të avancuar./Guardian/
