Ministri izraelit i Mbrojtjes, Israel Katz, ka miratuar një plan për të pushtuar qytetin e Gazës, sipas mediave lokale të mërkurën.
Transmetuesi publik KAN tha se Katz e quajti planin “Qerrat e Gideonit B”, sipas Operacionit “Qerrat e Gideonit”, një ofensivë tokësore që u nis në maj për të zgjeruar pushtimin e enklavës dhe për të evakuuar plotësisht palestinezët nga Gaza veriore.
“Si pjesë e planit, do të lëshohen urdhrat e nevojshëm për thirrjen e rezervave për të kryer sulmin”, tha transmetuesi, pa specifikuar numrin e trupave të nevojshme.
Të martën, Shefi i Shtabit të Izraelit, Eyal Zamir, përshkroi fazat e planit të pushtimit, duke përfshirë përforcimin e forcave izraelite në Gazën veriore.
Mediat njoftuan të mërkurën poashtu se, ushtria izraelite do të thërrasë 60,000 ushtarë rezervistë për të luftuar në qytetin e Gazës sipas këtij plani pushtimi
Transmetuesi tha se trupat e rregullta që veprojnë në Rripin e Gazës do të zgjerohen gjithashtu.
Sipas radios së ushtrisë izraelite, numri i rezervistëve brenda ushtrisë do të rritet në 130,000 në total në përgatitje për “një operacion të zgjatur që do të zgjasë disa muaj” deri në mesin e vitit 2026.
Kanali 12 raportoi më herët të martën se urdhrat për rekrutim emergjent, të njohur si Urdhri 8, janë lëshuar tashmë nga ushtria.
Mobilizimi i ushtarëve do të fillojë më 2 shtator, me planin e pushtimit që do të diskutohet në kabinet në ditët në vijim, tha e përditshmja Yedioth Ahronoth.
Më 8 gusht, Kabineti i Izraelit miratoi një plan të Kryeministrit Benjamin Netanyahu për të ripushtuar gradualisht Rripin e Gazës, duke filluar me Qytetin e Gazës.
