Deputetja e Nismës Socialdemokrate, Xhavahire Izmaku, ka folur pas vendimit të Gjykatës Kushtetuese lidhur me ngërçin në konstituimin e Kuvendit të Kosovës.
Ajo e ka cilësuar aktgjykimin si të mirëseardhur dhe të nevojshëm, duke theksuar se ofron më shumë qartësi sesa ai i vitit 2014.
“Ka pasur mangësi në aktgjykimin e vitit 2014. Tani kemi një sqarim më të mirë, edhe pse ende nuk e kemi të publikuar vendimin e plotë”, u shpreh Izmaku në emisionin “Ditari” në Tëvë1.
Sipas saj, vendimi i ri që kufizon numrin e herëve që mund të propozohet i njëjti kandidat për kryetar të Kuvendit është logjik dhe ndihmon në parandalimin e zvarritjeve.
“Është normale që pa kufi nuk mundet me u ezauru një propozim. Ky kufizim është i nevojshëm dhe mund të shërbejë si pikënisje për zgjidhje. Besoj që tash jemi vonë, por shpresoj se ky aktgjykim do të sjellë reflektim te të gjitha partitë”, shtoi ajo.
Izmaku theksoi se urdhërimi që të gjithë deputetët të jenë prezent dhe të marrin pjesë në votim është një element pozitiv që mund të çojë drejt një epilogu më të shpejtë dhe funksional të Kuvendit. /teve1.info/
