Drejtuesit e Juventusit pritet të takohen javën e ardhshme me përfaqësuesit e Kenan Yildiz për të diskutuar rinovimin e kontratës, ndërkohë që Bayern Munich dhe Barcelona janë klubet më të fundit që i janë bashkuar garës për talentin turk.
Juventusi ka planifikuar të zhvillojë një takim me agjentët e Yildiz javën që vjen, pasi Bianconerët janë të vendosur t’i ofrojnë numrit të tyre 10 një kontratë të re dhe më afatgjatë.
Së fundmi, disa klube të mëdha si Chelsea dhe Arsenal janë lidhur me emrin e reprezentuesit të Turqisë, familja e të cilit raportohet se është takuar në shkurt me agjentin Jorge Mendes për të diskutuar një largim të mundshëm gjatë verës.
Megjithatë, Yildiz është kthyer në një lojtar kyç nën drejtimin e Igor Tudor, dhe paraqitjet e tij mbresëlënëse në Kupën e Botës për Klube kanë forcuar edhe më shumë statusin e tij si lider në skuadër.
Sipas të përditshmes italiane Gazzetta dello Sport, Barcelona dhe Bayern Munich kanë treguar interes serioz për 20-vjeçarin gjatë ditëve të fundit, por Juventusi nuk ka ndërmend të dëgjojë asnjë ofertë dhe synon vetëm rinovimin.
Madje, Gazzetta shkruan se Barcelona mund të ofrojë edhe mbrojtësin Ronald Araujo, një objektiv i kahershëm i Juventusit, në një marrëveshje shkëmbimi për Yildiz. Megjithatë, Bianconerët i kanë të qarta planet: ata duan ta mbajnë Yildiz në Torino edhe pse kontrata aktuale e tij skadon vetëm në vitin 2029.
