Deputeti i Lidhjes Demokratike të Kosovës (LDK), Alban Zogaj, ka bërë të ditur se kjo parti është në përgatitje të një lënde që do t’i drejtohet Gjykatës Kushtetuese të vendit, për siç u shpreh ai, “shkeljet e vazhdueshme të Kushtetutës” gjatë seancave të fundit parlamentare.
Deklarata e Zogajt erdhi pas ndërprerjes së seancës së radhës dhe dështimit të 41-të me radhë për konstituimin e legjislaturës së nëntë të Kuvendit të Kosovës.
“Edhe sot një seancë e re, një episod i ri dhe një shkelje e re e Kushtetutës dhe e rendit kushtetues në vendin tonë. Jemi tejet të shqetësuar dhe të brengosur me atë çfarë po ndodhë në Kuvendin e Kosovës. Në seancat e fundit Kushtetuta e vendit është duke u shkelur me vetëdije çdo ditë,” – u shpreh Zogaj para mediave.
Deputeti i LDK-së theksoi se partia e tij do të kërkojë interpretim nga Gjykata Kushtetuese lidhur me veprimet në seancat e fundit, duke shtuar se janë në koordinim me faktorë të tjerë për mënyrën e adresimit.
“Jemi në përgatitje të lëndës për t’iu drejtuar Gjykatës Kushtetuese. Do të kërkojmë interpretim për seancat e fundit, të cilat sipas nesh janë në kundërshtim me Kushtetutën dhe me aktgjykimin e fundit të gjykatës,” – shtoi ai.
Pas ndërprerjes së seancës nga kryesuesi Avni Dehari, përfaqësuesit e partive të tjera politike qëndruan për disa minuta në sallën plenare. Ndërkohë, vazhdimi i seancës është caktuar për datën 5 korrik, në orën 11:00.
