Sipas deputetit të Lëvizjes Vetëvendosje, Dimal Basha, Lidhja Demokratike e Kosovës duke mos e votuar konstituimin e Kuvendit të Kosovës e ka shkelur fjalën e dhënë më 8 prill.
Basha pas dështimit të rradhës të seancës konstituive të Kuvendit, ka thënë se LDK-ja duhet të mos e pengojë zgjedhjen e kryeparlamentarit dhe zhbllokimin e ngërçit politik.
Ai e ka quajtur të paarsyeshme kërkesën e LDK-së për të përfshirë PDK-në në një marrëveshje të mundshme, kur bashkëpunimi vetëm me Vetëvendosjen ishte refuzuar më parë.
“Ne i marrim parasysh ato që ndodhin, përfshirë ofertat që vijnë nga partitë tjerë, por është absurde me bë grupe punuese e me marrë ekspertë dhe mos me votu një komision të thjeshtë. E kuptojmë që LDK-ja ka dalë me një propozim dhe është diskutu këtu që ata po thonë që kanë dalë me një ofertë, por është e pakuptueshme për qytetarët e Kosovës për shkak se ata po thonë që nuk ka pasur asnjë ofertë tjetër. Ne kemi bë një ofertë politike për të kalu krizën edhe të Kuvendit edhe te Qeverisë por LDK e ka refuzu atë. Për mua është e pakuptimtë se cilat nga pikat që i ka bë LDK-ja nuk mund t’i implementojë pa PDK-në. Pra, për cilën pikë i duhet PDK-ja patjetër për ta kaluar ngërçin. Për më tepër nëse LDK-ja vazhdon të thotë se është parti e fjalës, fjala duhet me u mbajt, atëherë kryetari i LDK-së duhet ta mbajë fjalën e dhënë më 8 prill ku ka thënë se ne nuk do të jemi pengesë në konstituimin e Kuvendit. Gara ka qenë për parlament po ju e dini që fuqia qëndron te ekzekutivi, pra pushteti është te qeveria edhe e kuptoj që e kanë rival Albin Kurtin, por ne Albin Kurtin nuk e kemi kandiduar për kryetar parlamenti, nëse duan te shtyhen me të duhet të votojnë e ta zhbllokojnë Kuvendin e pastaj me shku me u mat atje te numrat për qeveri”, ka thënë ai.
