Kryetari i Aleancës për Ardhmërinë e Kosovës, Ramush Haradinaj, ka bërë të ditur sot nominimin e z. Ajet Avdyli si kandidat i AAK-së për kryetar të komunës së Artanës në zgjedhjet e ardhshme lokale.
Në profilin e tij në Facebook, Haradinaj theksoi se z. Avdyli përfaqëson mishërimin e përkushtimit për çështjen kombëtare, duke kontribuar me vite të tëra si në diasporë, ashtu edhe në vendlindje. Ai vlerësoi lart angazhimin e Avdylit në shërbim të komunitetit shqiptar jashtë vendit, si dhe punën e tij të çmuar në Artanë, ku është i njohur dhe i respektuar.
“Avdyli është mishërim i përkushtimit për çështjen kombëtare, si në diasporë, ku për dekada ka jetuar dhe vepruar në shërbim të komunitetit shqiptar, ashtu edhe në vendlindje, ku angazhimi i tij është i njohur e i vlerësuar”, shkroi Haradinaj.
Ai shtoi se përvoja profesionale e Avdylit në fushën e arsimit dhe të financave përbën një garanci të fortë për një qeverisje të përgjegjshme dhe në shërbim të qytetarit.
“Qeverisja komunale është niveli më i afërt i veprimit për të përmirësuar jetën e përditshme të qytetarëve tanë. Me Avdylin, Artana fiton një mundësi të re për t’u qeverisur me dinjitet, dije dhe përkushtim”, tha kreu AAK-së.
