Federata e Futbollit të Kosovës (FFK), të martën ka njoftuar se ka nxjerrë në shitje biletat për ndeshjen e barazhit të Superligës ndërmjet Vushtrrisë dhe Llapit.
Kjo ndeshje luhet të shtunën në stadiumin “Fadil Vokrri” në Prishtinë prej orës 16:00 dhe tribunat pritet të jenë të stërmbushura pasi interesimi është i madh.
Fituesi i barazhit, do ta siguroj pjesëmarrjen në Superligën e Kosovës për sezonin e ardhshëm dhe të dyja skuadrat kanë premtuar angazhim dhe lojë të fortë.
FFK-ja, ka bërë të ditur se biletat mund të blihen online dhe ka publikuar linkun për blerjen e tyre, ndërsa tribunat që do të jenë të hapura janë perëndimi, jugu e veriu por jo edhe lindja.
Çmimi i biletave në veri dhe jug kushton 3 euro kurse për tribunën e perëndimit është 10 euro.
Ndërkohë, FFK ka bërë të ditur se tifozët e Vushtrrisë do të vendosen në tribunën në veri kurse ata të Llapit në atë të jugut.
Vushtrria doli e dyta në Grupin B të Ligës së Parë dhe në barazhin e kësaj kategorie mposhti Lirinë kurse Llapi përfundoi i teti në Superligë.
