Drejtori i Dhomës së Tregtisë dhe Industrisë Kosovë, Kushtrim Ahmeti ka thënë se nëse vendimi I ZRrE-së për tregun e hapur të energjisë nuk pezullohet do të ketë ulje të kapacitetit prodhues.
Ahmeti në emisionin “Ditari” në Tëvë1 është shprehur se nëse një gjë e tillë ndodhë do të shkaktohej një problem duke pasur parasysh që në Kosovë nuk ka numër të madh të bizneseve prodhuese.
“Disa biznese paralajmëruan që dy gjëra të para që do t’i bëjnë nëse përfundimisht ky proces nuk do të ndalet, çështja e parë do të jetë ulja e numrit të punëtorëve dhe çështja e dytë do të jetë mbyllja totale e gjithë prodhimit në vendin tonë. Ne edhe ashtu nuk është se kemi një numër të madh të bizneseve të cilat janë prodhuese, më shumë kemi shërbyese dhe tregtare dhe edhe këto që janë prodhuese të vijnë në një situatë të tillë siç tash mund të vijnë nëse nuk shtyhet ose nuk pezullohet ky proces shkakton një problem jashtëzakonisht shumë të madh, e ulë kapacitetin tonë prodhues që e kemi”, ka thënë Ahmeti.
Zyra e Rregullatorit për Energji (ZRrE) ka njoftuar se nga 1 qershorit bizneset që kanë mbi 50 të punësuar ose qarkullim mbi 10 milionë euro do të dalin në tregun e lirë të energjisë elektrike.
Ky vendim ka ngjallur reagime e kundërshtime nga bizneset vendore.
