Takimin e fundit ballë për ballë në kuadër të dialogut e patën në korrik të vitit të kaluar.
Megjithatë, angazhimi i Gjermanisë në krye me kancelarin Olaf Scholz i bëri bashkë sërish, kryeministrin e Kosovës Albin Kurti dhe presidentin serb Aleksandër Vuçiq në një darkë joformale në fillim të majit.
Pas kësaj darke, shefi i diplomacisë evropiane Josep Borrell paralajmëroi një takim të ri para verës mes Kurtit e Vuçiqit.
Megjithatë nga pala kosovare thanë se nuk ka ndonjë datë për takime të nivelit të lartë.
“Datë për një takim të radhës ende nuk ka. Që të ketë takime të nivelit të lartë politik, duhet të ketë substancë të mjaftueshme për ato takime. Në anën tjetër, ne kemi treguar gatishmërinë dhe vullnetin tonë për t’u angazhuar në mënyrë konstruktive në këtë proces. Mbetet për t’u parë nëse dhe pala serbe shpreh të njëjtën gatishmëri”, thotë Klisman Kadiu nga Qeveria e Kosovës.
Profesori i marrëdhënieve ndërkombëtare, Ibrahim Gashi thotë se takimet e niveleve të larta kryesisht zhvillohen për t’i lëvizur proceset.
“Ka një kohë që ndërmjetësit ndërkombtare janë të interesura që t’i rikthejnë palët në bisedime dhe ta riaktivizojnë dialogun por pa e dit agjendën mund të konsiderojmë se takimi duhet të jetë në funksion të dinamizmit të dialogut të cilën ndërkombtart në krye me ShBA-në e BE-në po e konsiderojnë momentum dhe po bëjnë presion pozitiv te palët”, thotë Gashi.
Megjithatë sipas Arbër Fetahut nga Grupi për Studime Juridike dhe Politike ka rrezik që takimi të zhvillohet vetëm sa për sy e faqe.
“Nëse e shohim që nuk ka marrëveshje për targa, nuk ka marrëveshje për të pagjetur dhe energjinë duket që edhe një takim i radhës i liderëve mund të jetë në aspektin teknik i mangët pasi që temat nuk janë përmbyllur dhe nuk ka progres por në anën tjetër mund të jetë njëfarë opsioni për manovrim në këtë proces’, thotë Fetahu.
Që nga takimi i fundit mes Kurtit dhe Vuçiqit në kuadër të dialogut në korrik të vitit të kaluar, bisedimet janë zhvilluar në nivel negociatorësh. Palët që nga atëherë nuk janë dakorduar as për një marrëveshje të përhershme për targat.
Kronika e realizuar nga gazetari Gojart Jashari.