E nuk vonoi shumë, ministrja e Jashtme Donika Gërvalla, e dorëzoi edhe zyrtarisht aplikimin për në Këshill të Evropës në Strasburg të Francës. Pas dorëzimit, ajo u shpreh optimiste për pranimin e Kosovës.
E Lituania edhe zyrtarisht u shpreh në përkrahje të Kosovës për t’u anëtarësuar në Këshillin e Evropës. Kështu njoftoi presidentja Vjosa Osmani, në një konferencë të përbashkët me presidentin lituanez Gitanas Nausėda.
“Mendoj se ju pajtoheni se këto vlera janë të kërcënuara nga Rusia jo vetëm në Ukrainë por edhe më gjerë. Udhëkryqi ku gjendemi do ta definojë Evropën për vitet e ardhshme… Zotëri President, sot, gjatë takimit kemi diskutuar për anëtarësimin e Kosovës në Këshillin e Europës dhe NATO-s e BE-së dhe ju falënderoj për përkrahjen që na keni dhënë, si dhe për shtetndërtimin e Kosovës ne jemi falënderues”, tha Osmani.
Përveç anëtarësimit në Këshillin e Evropës, presidenti lituanez Nauseda, tha se Kosovën e mbështet edhe në rrugën drejt anëtarësimit në NATO.
E meritat drejt anëtarësimit në Këshillin e Evropës, nuk i mori vetëm për vete Qeveria e tanishme e Kosovës.
Për pranimin e shtetit të Kosovës në Këshillin e Evropës, mjafton përkrahja e dy të tretave të shteteve anëtare, nga 46 sa janë gjithsej. Por, shpresat për pranim, u shtuan veçanërisht pas përjashtimit të Rusisë.
Këshilli i Evropës është organizata më e vjetër ndërqeveritare që për qëllim kryesor ka sigurimin e bashkëpunimit dhe unitetit ndërmjet anëtarëve të saj në lëminë e mbrojtjes së të drejtave të njeriut, demokracisë e sundimit të ligjit.
Raporti i gazetares Doruntina Isufi.
