Akuzat i kanë të përbashkëta, por jo edhe seancat për deklarimin rreth tyre.
Nga katërshja e ish krerëve të UÇK-së, i pari që doli para gjykatësit të procedurës paraprake ishte ish presidenti, Hashim Thaçi.
Ish drejtori politik i UÇK-së, i mohoi pretendimet e reja të Zyrës së Prokurorit të Specializuar, që flasin për krime të kryera në fshatrat Budakovë dhe Semetisht të komunës së Suharekës, si dhe në një konvikt në Gjilan.
Afatin prej 30 ditësh, nuk e priti as ish kryekuvendari, Kadri Veseli, i cili u deklarua i pafajshëm.
E nga videolidhja, Veseli bëri thirrje që gjykimi të fillojë sa më parë.
Për dallim nga Veseli e Thaçi, ish kryekuvendari Jakup Krasniqi ishte i pranishëm në gjykatore, ku ishte veshur me simbole kombëtare.
Ai u deklarua i pafajshëm për akuzat e reja, duke i quajtur si gënjeshtra të krijuara mbi baza serbe.
Qysh në paraqitjen e parë për këto akuza, fajësinë e mohoi edhe ish shefi i grupit parlamentar të VV-së, Rexhep Selimi.
Këto pretendime të reja të ZPS-së, iu janë bashkuar aktakuzës së katërshes së UÇK-së, e cila ishte konfirmuar më 26 tetor të vitit 2020.
Raporti i gazetares Florijeta Dernjani.