Sot, Komisioni Qendror i Zgjedhjeve do të fillojë me certifikimin e subjekteve politike dhe kandidatëve për pjesëmarrje në Zgjedhjet për Kuvendin e Kosovës, të cilat do të mbahen më 9 shkurt 2025.
Kështu ka bërë të ditur për tëvë1.info, zëdhënësi i KQZ-së, Valmir Elezi, i cili ka thënë se në rend dite është certifikimi i 11 subjekteve politike me më shumë se 600 kandidatë.
Tutje, ai ka njoftuar se nga 1 shtatori deri më 11 dhjetor kanë aplikuar 28 subjekte politike, prej tyre 20 parti politike, 5 koalicione dhe 2 nisma qytetare dhe 1 kandidat i pavarur.
“Mund t’iu konfirmoj se Komisioni Qendror i Zgjedhjeve do të fillojë me certfikimin e subjekteve politike dhe kandidatëve për pjesëmarrje në Zgjedhjet për Kuvendin e Kosovës, të cilat do të mbahen më 9 shkurt 2025. Në mbledhjen e sotme të KQZ-së (e mërkurë, 18 dhjetor 2024) në rend dite është certifikimi i 11 subjekteve politike me më shumë se 600 kandidatë. Gjatë periudhës për aplikim të subjekteve politike për certifikim dhe dorëzimin e listës së kandidatëve për deputetë për pjesëmarrje në Zgjedhjet për Kuvendin e Republikës së Kosovës (1 shtator – 11 dhjetor 2024, 23:59) kanë aplikuar: 28 subjekte politike, prej tyre: 20 parti politike; 5 koalicione; 2 nisma qytetare dhe 1 kandidat i pavarur. Numri i përgjithshëm i kandidatëve për deputetë, që përfaqësojnë këto subjekte politike, është 1,280 kandidatë”, thuhet në përgjigjen e Elezit./teve1.info/
