Kryetari i Këshillit Kombëtar Shqiptar, Nevzad Lutfiu ka njoftuar se ka marrë kundërpërgjigje nga Ministria për të Drejtat e Njeriut dhe Minoriteteve në Beograd në lidhje me konkursin për subvencionimin e kulturave bujqësore nga Fondi i Republikës së Kosovës.
Lutfiu thotë se Ministria ka kërkuar që konkursi të anulohet dhe të shfuqizohet vendimi i KKSh-së, por sipas tij vendimi nuk do të shfuqizohet.
“Ministria në fjalë kërkon që konkursi të anulohet (të shfuqizohet vendimi i KKSH-s), nëse ne nuk e shfuqizojmë këtë vendim atëherë atë do ta bëj vet Ministria, me pretekstin se vendimi është i jashtëligjshëm thuhet në kundërpërgjigjen e Ministrisë”, ka shkruar Luftiu në Facebook.
Madje, ai thotë se Serbia po e konsideron të jashtëligjshëm një vendim transparent të Këshillit Kombëtar Shqiptar, për t`i mbështetur familjet shqiptare të Luginës së Preshevës.
“Serbia e cila autorët e Banjskës po i mban të lirë, po e konsideron të jashtëligjshëm një vendim (krejt transparent) të Këshillit Kombëtar Shqiptar për t’i mbështetur familjet shqiptare të Luginës së Preshevës e që për pjesën më të madhe të tyre bujqësia është veprimtaria kryesore e ekzistencës së tyre, e që për më tepër bëhet fjalë për një donacion, e jo nga mjetet e rregullta të Këshillit”, ka thënë ai./teve1.info/
