Me rastin e dhjetëvjetorit të pranimit të Komitetit Olimpik të Kosovës (KOK) në Komitetin Olimpik Ndërkombëtar (IOC), kreu i IOC-së, Thomas Bach po qëndron për vizitë në Kosovë.
Në konferencën e mbajtur të hënën, Bach tha se Kosova është shembulli më i mirë se si brenda një kohe të shkurtër mund të arrihen suksese të mëdha.
Sipas tij, medaljet olimpike të fituara nga Kosova në xhudo, janë dëshmi e angazhimit të KOK-ut për zhvillimin e sportit të vend.
Kosova ka fituar pesë medalje olimpike, tri të arta, një të argjendtë dhe një të bronztë falë Majlinda Kelmendit, Nora Gjakovës, Distria Krasniqit dhe Laura Fazliut.
“Këto dhjetë vite kanë dëshmuar histori suksesi në shumë aspekte. Sigurisht, kemi pesë medalje olimpike që janë fituar, pastaj në tri Lojëra Olimpike, Kosova ka marrë pjesë në to dhe për këtë i gjithë populli i Kosovës mund të jetë shumë krenar së bashku me Komitetin Kombëtar Olimpik sepse këto suksese nuk vijnë nga qielli por falë punës së palodhshme”, ka thënë Bach.
Ndërkohë, kreu i Komitetit Olimpik të Evropës, Spyros Capralos shtoi se një sukses tjetër të madh Kosova e shënoi edhe vitin e kaluar kur fitoi të drejtën e organizimit të Lojërave Mesdhetare në vitin 2030.
Ai insistoi se ky do të jetë një tjetër moment që Kosova do të avancojë edhe më tutje në sport, duke ndërtuar infrastrukturë të re sportive por edhe të promovojë disiplina të reja të sporteve.
“Do të jeni nikoqir te Lojërave Mesdhetare të vitit 2030, kjo është e rëndësishme, një ligj i ri është miratuar, ai do të ndihmojë në ndërtimin e infrastrukturës, organizimin e kësaj ngjarje”, shtoi ndër të tjera Capralos.
Në fund, presidenti i KOK-ut, Ismet Krasniqi theksoi se në këto dhjetë vite, të gjitha sukseset e arritura janë bërë falë mbështetjes dhe bashkëpunimit me institucionet ndërkombëtare sportive.
Gjatë ditës së hënë, Bach dhe Capralos, të shoqëruar nga drejtuesit e KOK-ut, janë mirëpritur nga kryeministri i Kosovës, Albin Kurti që ishte i shoqëruar nga zëvendësministrja për Kulturë, Rini dhe Sport, Daulina Osmani.
