Ministri i Punëve të Brendshme, Xhelal Sveçla ka njoftuar për një bastisje tjetër që është kryer sot në veri të vendit.
Ministri përmes një video ka prezantuar armatimin e gjetur derisa ka shtuar se ato ishin të fshehura në një ahur.
“Ky është municioni, armët dhe uniformat që janë gjetur sot gjatë nje bastisjeje në veri të vendit. Këto të gjitha janë gjetur të fshehura nën një ahur”.
Tutje, ai ka thënë se përveç uniformave të ushtrive të Serbisë dhe Rusisë, në këto dëshmi shihen uniforma të ushtrive të ShBA-ve dhe asaj Britanike dhe sipas tij ky fakt shpërfaq planet dhe skenarët ogurzi për të kryer krime e sulme dhe për të fajësuar shtete të tjera.
“Çdokush që tenton të cenojë rendin kushtetues, sigurinë e vendit, nuk do të mund t’i ikë ndëshkimit. Republika e Kosovës, forca e ligjit të drejtë në shtetin tonë demokratik do të ngadhënjejë”, ka thënë ai.
