E qytetarëve të tri komunave shqiptare në Serbi, po vazhdojnë të iu pasivizohen adresat dhe dokumentet. Mbi katër mijë qytetarë janë pasivizuar vetëm në komunën e Medvegjës, e pas tyre ky fenomen po vazhdon edhe në komunën e Bujanocit dhe Preshevës. Osman Sadiku nga komuna e Medvegjës qe 10 vite është në proces gjyqësor.
Nga viti 2020, Serbia ka pasivizuar mbi katër mijë qytetarë në komunën e Medvegjës.
E pavarësisht që në regjistrimin e fundit të popullsisë figurojnë mbi gjashtë mijë persona, mbi katër mijë prej tyre janë fshirë nga lista e votuesve.
Njëri nga ta është edhe Osman Sadiku, i cili me këtë fenomen është përballur nga viti 2014-të.
E pavarësisht që kanë kaluar 10 vite, Serbia ende nuk po ia kthen dokumentet dhe adresën.
“Jam taku me komandimin e policisë këtu, të njëjtën kohë, tu mendu unë që jam pasivizu vetëm unë e kom konstatu në bazë të kontrollave që i ka bë se është pasivizuar një familje prej 70 – 80 anëtarëve..”, ka deklaruar ai.
Që pasivizimi po vazhdon edhe në komunën e Bujanocit dhe të Preshevës e thotë edhe kryetari i Këshillit Kombëtar Shqiptar, Nevzad Lutfiu.
Kryetarët e këtyre komunave po kërkojnë më shumë vëmendje ndërkombëtare për këtë çështje.
Për çështjen e pasivizimit dhe problemeve të tjera, shqiptarët e tri komunave në Serbi kanë protestuar para institucioneve atje për të kërkuar të drejtat e tyre të pakicave.
