Për herë të dytë, Kuvendi Komunal në Prishtinë dështoi për të miratuar buxhetin për vitin e ardhshëm. Pozita fajin po ia lë opozitës së kryeqytetit për bllokim të projekteve derisa nga Partia Demokratike e Kosovës dhe Vetëvendosja në Prishtinë thonë se fajtori kryesor për këtë gjendje është i pari i kryeqytetit, Përparim Rama. Nga organizata INPO thonë se këto dështime kanë pasoja financiare dhe juridike.
Për herë të dytë, dështoi të votohet buxheti i kryeqytetit për vitin 2025.
Në sallën e Kuvendit Komunal të Prishtinës, të hënën nuk morën pjesë fare asamblistët e Partisë Demokratike të Kosovës ndërsa Vetëvendosje nuk qëndruan për votim.
Shefi i asamblistëve të Partisë Demokratike të Kosovës në kryeqytet, Leutrim Retkoceri ka thënë se fajtori për këtë bllokim është koalicioni aktual në komunë.
Retkoceri thotë se PDK-ja nuk voton buxhet i cili nuk është transparent për qytetarët.
Ankesa për planin e buxhetit kanë edhe Vetëvendosja në Prishtinë.
Asamblisti i kësaj partie, Besart Krasniqi thotë se nuk janë ftuar nga kryetari as për një takim.
Por nga komuna, fajtor i lënë të dyja këto parti.
Nënkryetari i Prishtinës, Alban Zogaj në Tëvë1 ka thanë se nëse nuk miratohet buxheti për kryeqytetin atëherë do t’i humbin afër 9 milionë euro.
“E bllokojnë dhe tendencat janë për me blloku për qëllime partiake dhe të votës. Bllokimi i Prishtinës sot po vjen nga Vetëvendosje dhe PDK…Ka kohë edhe pak, afati i fundit është dhjetori, nëse nuk votohet në dhjetor, atëherë kur shkon për votim në Kuvendin e Kosovës futemi në një zonë të rrezikshme, ku sipas Ligjit për qeverisje lokale nëse nuk votohet buxheti atëherë asambleja shkon në zgjedhje. I bie që ne t’i humbim rreth 9 milionë euro”, tha nënkryetari i Prishtinës, Alban Zogaj.
Edhe nga organizata Iniciativa për Progres thonë se ky dështim i miratimit të buxhetit ka pasoja.
Hulumtuesi, Diellor Gashi thotë se pasojat janë si në aspektin financiar ashtu edhe në atë juridik.
Gashi thotë se duhet të gjendet një mënyrë nga të gjithë për të votuar buxhetin.
Kuvendi i Komunës së Prishtinës mbajtën një mbledhje të jashtëzakonshme edhe më 18 shtator, mirëpo edhe aty dështuan për votim.