Demhasaj në emisionin “Këndi i Debatit” në Tëvë1, tha se ky është një model që duhet të ndiqet edhe nga vendet e tjera të rajonit.
“Figura e Abazoviq nuk besoj që ka qenë kontroverse, por ka qenë një tip që është ndërtuar politikisht duke akuzuar e kritikuar pushtetin e deritanishëm në Mal te Zi. Kjo ndoshta është si model me e përcjellë edhe te shtetet tjera të rajonit me një shumicë shqiptare, dhe nëse shqiptarët në Maqedoni mund ta ruajnë unitetin si faktor politik, ku mund të jenë vendimtare edhe në çdo qeveri që zgjidhet në Maqedoni, e që nuk është e pamundur që edhe atje të vie deri tek zgjedhja e një kryeministri shqiptar”, tha tutje Demhasaj.
Sipas tij, në këtë çështje pozitive është fakti që komuniteti shqiptar në Mal të Zi tashmë ka marrë një orientim në partinë e Gjykanoviçit, e që u krijohet mundësia t’i kundërvihen opozitës serbe.
Mirëpo, Demhasaj theksoi se e rëndësishme është që Abazoviq të punojë për të drejtat e shqiptarëve në Mal të Zi.
“Një element pozitiv është që tashmë komuniteti shqiptar në Mal të Zi ka marrë një orientim me partinë e Gjykanoviçit, kështu që në një farë mënyre mund t’i kundërvihen opozitës së tanishme në Mal të zi e cila është një opozitë serbe. Por ajo që mendoj që duhet të bëj kryeministri aktual Abazoviq, është të punojë në drejtim të drejtave të shqiptarëve në Mal të Zi”, u shpreh ai.
Gjithashtu ai shtoi se shqiptarët në Mal të Zi asnjëherë nuk kanë qenë më të përfaqësuar sikurse tani.
“Pra kemi një qeveri që udhëhiqet nga një shqiptar, por njëkohësisht kemi edhe një ministër brenda kësaj qeverie që është shqiptar. Që do të thotë shqiptarët në Mal të Zi nuk kanë qenë asnjëherë më të përfaqësuar”, deklaroi Demhasaj.
