Ministria e Brendshme e Maqedonisë së Veriut është deklaruar për Tëvë1 rreth arrestimit të ish-ushtarit të UÇK-së, Blerim Ramadanit nga Ferizaj.
Sipas tyre, zyrtarët policorë të Maqedonisë së Veriut kanë ndaluar, Blerim Ramadanin bazuar në një fletarrest të lëshuar nga Serbia.
Tutje thuhet se Ramadani i është dorëzuar zyrtarëve policorë nga SVR për procedura të mëtutjeshme.
“Më datë 17.07.2024 në ora 16:00 në vendkalimin kufitar Jazhincë, gjatë rrugës për në vend, zyrtarët policorë i kanë hequr lirinë B.R (47) nga Kosova, pasi gjatë kontrollit të pasaportave dhe kontrolleve është konstatuar se në evidencën zyrtare ka pasur. masë “arrest”, me kërkesë të Interpol Serbisë. I njëjti i është dorëzuar zyrtarëve policorë nga SVR Tetovë për procedurë të mëtutjeshme”, thuhet në përgjigjen e tyre për Tëvë1.
Kujtojmë se, ish-ushtari i UÇK-së, Blerim Ramadani është ndaluar nga Policia e Maqedonisë së Veriut, me një fletarrest të lëshuar nga Serbia.
Këtë lajm e ka konfirmuar edhe Ministria e Punëve të Jashtme dhe Diasporës.
“Ministria e Punëve të Jashtme dhe Diasporës njofton opinionin publik se është informuar për arrestimin e një shtetasi kosovar nga Policia e Maqedonisë së Veriut bazuar në një fletarrest të lëshuar nga Serbia. Fjala është për z. Blerim Ramadani, ish-anëtar i Zonës Operative të Nerodimes të UÇK-së”, thuhet në përgjigjen e MPJD-së.
Nga MPJD kanë thënë se ambasadori i Kosovës në Maqedoninë e Veriut, Florian Qehaja është angazhuar intensivisht për ta trajtuar këtë rast.
Ish-ushtari i UÇK-së ndalohet në Maqedoninë e Veriut me fletarrest të lëshuar nga Serbia
