Mesfushori Ylber Ramadani vlerëson se Shqipëria nuk ishte indiferente përballë Italisë, Kroacisë dhe Spanjës në fazën e grupeve të Kampionatit Evropian “Gjermania 2024”.
Shqipëria e mbylli me një pikë paraqitjen e dytë të saj në Evropian, duke përfunduar e fundit në grupin e saj.
Ramadani ishte prej më të mirëve te Shqipëria në ciklin kualifikues dhe në ndeshjet e Grupit B. 28-vjeçari është shprehur i lumtur dhe krenar që ishte pjesë e Shqipërisë në këtë rrugëtim, të cilin e ka quajtur të jashtëzakonshëm.
“Tri ndeshje, tri finale me tri nga ekipet më të mira të Evropës, dy prej të cilave janë shpallur edhe kampione Evrope dhe Bote. Luajtëm fort, si të barabartë me Italinë, Kroacinë dhe Spanjën, duke treguar karakter në çdo sfidë. Faleminderit çunave, faleminderit stafit teknik dhe të gjithë stafit drejtues që ka qenë pranë nesh. Një falënderim të veçantë për tifozët që na kanë mbështetur në stadium, në çdo rrugë e shesh të Gjermanisë, si edhe çdo ditë në kampin tonë stërvitor”, ka shkruar Ramadani të martën në Facebook.
Ai ishte i pazëvendësueshëm në tri ndeshjet e Shqipërisë në “Euro 2024”. Ramadani është pjesë e ekipit nga Serie A, Lecce dhe pas Evropianit mund të ndërroj ambient pasi interesim për transferimin e tij, ka shfaqur skuadra e Napolit.
